IKEA innkallar LEOPARD barnastóla

Forsvarsmenn IKEA verslananna biðja viðskiptavini sína sem eiga LEOPARD barnastól að hætta strax að nota stólinn og skila sætinu og grindinni til IKEA. Tekið er á móti stólnum í Skilað og skipt og verður hann að fullu endurgreiddur.

Í tilkynningu frá IKEA segir að smellulásar sem festi sætið við grindina eigi það á hættu að brotna sem geti valdið því að sætið detti niður um grindina. Börn geti orðið fyrir meiðslum á höfði og öðrum líkamshlutum við það að detta og þeim geti stafað köfnunarhætta af lausum smellulásum.

IKEA hefur fengið ellefu tilkynningar vegna brotinna smellulása frá kaupendum í Evrópu. Þar á meðal er eitt tilvik þar sem sæti stólsins datt niður um grindina á meðan barn sat í því. Barnið marðist á fótleggjum. Í öðru tilviki fannst laus smellulás í munni barns en hann var fjarlægður áður en skaði hlaust af.

Í tilkynningunni frá IKEA er beðist velvirðingar á öllum óþægindum sem kunna að hljótast af þessu.