Deila um tónlistarskóla leyst

Borgaryfirvöld komu til móts við forsvarsmenn tónlistarskóla í Reykjavík á fundi í gær með því að bjóða fram 50 milljóna króna viðbótarframlag fram til haustsins frá því sem áður stóð til.

Tónlistarskólum var gert að skera niður á þessu ári vegna efnahagsástandsins, en þegar tilkynnt var um 12 prósenta niðurskurðinn varð misskilningur þess valdandi að stjórnendur skólanna gerðu ekki ráð fyrir að niðurskurðurinn tæki gildi fyrr en næsta haust. Hann átti hins vegar að taka gildi þegar um áramót. Ekki var gert ráð fyrir því í áætlunum tónlistarskólanna, sem setti þá í mikinn rekstrarvanda.

Deilan snerist um 73 milljónir sem bar í milli. Borgaryfirvöld hafa nú ákveðið að koma til móts við skólana með 50 milljóna króna framlagi. Enn þurfa skólarnir sem sagt að skera niður um 23 milljónir fram til haustsins.

Kjartan Magnússon, formaður menntaráðs, segir andann á fundinum í gær hafa verið góðan. „Ég kom með hugmynd að lausn og það var tekið vel í hana," segir hann. Hann er bjartsýnn á að málinu sé þar með lokið í bili af hálfu borgaryfirvalda.

„Þetta er skárra en það sem við stóðum frammi fyrir fyrir mánuði," segir Sigurður Sævarsson, formaður Samtaka tónlistarskóla í Reykjavík. Hann býst við því að málinu ljúki með þessum hætti þótt það sé blóðugt fyrir tónlistarkennara að þurfa að taka á sig þessa kjaraskerðingu. - sh