Vaxtalækkun forsendan

„Við hjökkum í sama flaginu," segir Vilhjálmur Egilsson, framkvæmdastjóri Samtaka atvinnulífsins, um gang mála í stöðugleikaviðræðum samtakanna við Alþýðusamband Íslands og opinbera aðila.

Rætt var við fulltrúa sveitarfélaga og forystumenn ríkisstjórnar í gær. Vilhjálmur segist hafa lagt áherslu á að fjárlagahallanum yrði náð hraðar niður og fjárhagsáætlanir gerðar til þriggja ára.

Einnig hafi verið talað um aðkomu lífeyrissjóða að atvinnulífinu. Beðið sé ákvörðunar Seðlabankans á föstudag um stýrivexti. „Ef við fáum ekki umtalsverða vaxtalækkun þýðir ekkert að tala um launahækkanir," segir Vilhjálmur. - gar