AGS: Áhyggjur af samstöðuskorti Íslendinga

Fulltrúar Samstöðu, bandalags grasrósarhreyfinga, hittu í dag í annað sinn fulltrúa Alþjóðgjaldeyrissjóðsins en fyrri fundurinn átti sér stað þann 10. mars síðastliðinn. Í tilkynningu frá bandalaginu segir að í máli þeirra Franeks Roswadovski og Marks Flanagan, fulltrúum AGS, hafi komið fram að þeir hafi áhyggjur af því að samstöðu skorti í þjóðfélaginu um aðgerðir og markmið í efnahagsmálum þjóðarinnar.

Af hálfu Samstöðu sátu fundinn þau Heiða B Heiðarsdóttir,Sigurlaug Ragnarsdóttir og Árni Daníel Júlíusson. „Rætt var um aðkomu AGS að íslensku efnahagskreppunni. Aðgerðaráætlun AGS og ríkisstjórnarinnar miðar að þremur þáttum; Endurreisn banka, endurreisn gjaldmiðilsins og að gera ríkisfjárhaginn sjálfbærann, þ.e að ná jafnvægi í ríkismálum," segir í tilkynningu frá Samstöðu.

„Í lok þessa árs mættum við gera ráð fyrir að hafa náð botni efnahagskreppunnar. En síðara hluta árs 2010 myndum við fara að sjá merki um bata og strax 2011 yrði efnahagskerfið komið í gang að ný."

Uppgjör bankanna tekið lengri tíma en upphaflega stóð til

Þá segir að fram hafi komið hjá AGS fulltrúunum að uppgjör bankanna sem hrundu hefði tekið lengri tíma en gert var ráð fyrir. „Í raun mætti að segja að þessa tæpa átta mánuði sem liðnir eru frá hamförunum hefði lítið þokast í aðgerðaráætlun stjórnvalda og AGS."

„Fulltrúar AGS höfðu af því áhyggjur að samstöðu skorti í samfélaginu um aðgerðir og markmið í efnahagsmálum. Gott væri ef núverandi stjórn gæti náð tökum á ástandinu. Hún hefur nú þingmeirihluta og umboð frá kjósendum. Fram kom hjá fulltrúum AGS að þeir teldu að því fyrr sem til aðgerðanna kæmi, hversu sársaukafullar sem þær vafalaust verða fyrir þjóðina fyrstu mánuðina, því fyrr myndi birta á ný í efnahagsmálum þjóðarinnar," segir ennfremur.

Hlógu að ummælum Brown

Fulltrúar Samstöðu spurðu þá Roswadovski og Flanagan um umdeilda stýrivaxtastefnu peningastefnunefndar. „Fulltrúar AGS sögðust telja að til að ná jafnvægi á útflutningstekjum þjóðarinnar og koma í veg fyrir algjört hrun á innflutningi til landsins væri nauðsynlegt að halda stýrivöxtum háum um stundarsakir auk gjaldeyrishafta.

Þá var tæpt á fullyrðingum breska forsætisráðherrans Gordons Brown um samskipti breska forstætisráðuneytisins við AGS varðandi Icesave. „Þeim virtist skemmt og fullyrtu að slík samskipti hefðu aldrei átt sér stað og myndu aldrei eiga sér stað," segja samstöðumenn.