Skrifaði meistararitgerð um Elvis

Ólafur Halldór Ólafsson, bassaleikari rokksveitarinnar Weapons, er nýkominn heim frá Tennessee í Bandaríkjunum þar sem hann skrifaði meistaraverkefni um sögu Elvis Presley, eins helsta áhrifavaldar síns og sveitarinnar.

„Ég var í blaða- og fréttamennsku við Háskóla Íslands og ákvað að fara út síðustu önnina þegar ég var búinn með alla áfangana,“ segir Ólafur, en um skiptinám var að ræða.

Meistararitgerðin fjallaði um sjónvarpsþættina sem konungurinn kom fram í og hvernig þeir höfðu áhrif á feril hans og dægurmenningu samtímans. „Ég fór í Graceland og Sun Studios og hitti ýmsa sem voru fróðir um þetta. Þetta var rosa gaman,“ segir Ólafur. „Ég hitti fyrrverandi kærustu hans, Wendy Jackson. Fór á tónleika með henni og hitti hana á eftir. Hún sagði að hún hefði deitað hann í smá tíma.“

Í Sun Studios, hljóðveri Presleys og fleiri kappa á borð við Johnny Cash, gerði Ólafur sér lítið fyrir og keypti fyrstu plötuna sem Cash gaf út. Hún er 78 snúninga og upprunnin úr dánarbúi Cash, sem fjölskylda hans gaf Sun Studios.

Vegna ferðar Ólafs á heimaslóðir Presleys átti Weapons eftir að halda útgáfutónleika vegna plötu sinnar A Ditch in Time sem kom út fyrir jól. Bætt verður úr því á Sódómu Reykjavík í kvöld klukkan 21.

Weapons stefnir á tónleikaferð um Bandaríkin í haust og gerð nýrrar plötu. Gordon Raphael, fyrrum upptökustjóri The Strokes, tók upp A Ditch in Time og hefur þegar boðið sveitinni að taka nýju plötuna upp í hljóðveri sínu í Berlín.- fb