Jóhönnu var ekki kunnugt um umdeilda Möltuferð Össurar

Össur Skarphéðinsson utanríkisráðherra ræddi við fréttamenn að loknum ríkisstjórnarfundi í morgun. Þar ræddi hann meðal annars um frækna för sína til Möltu sem hefur verið nokkuð umdeild en Össur kom heim seint í gærkvöldi. Hann sagðist ekki hafa farið í ferðina með samráði ráðherra Vinstri grænna en gerði ráð fyrir því að þeir hefðu vitað af ferðinni. Í máli Jóhönnu Sigurðardóttur nú fyrir stundu á Alþingi sagðist henni ekki hafa verið kunnugt um ferð Össurar sem kom til baka í mjög góðu skapi.

Össur sagði hafa lært mikið í ferðinni og ræddi við þarlenda ráðamenn um hvernig þeir báru sig að í aðildarviðræðum við Evrópusambandið. Malta hefði þurft að semja um mörg erfið sérstæð mál og því hefði verið lærdómsríkt að heyra þeirra hlið á þeim málum.

Össur var einnig spurður um kínverska sendiherrann en hann sagðist telja að sendiherrann væri enn hér á landi.

Jóhanna var spurð út í umrædda ferð Össurar í óundirbúnum fyrirspurnum á Alþingi stuttu eftir ríkisstjórnarfundinn en þar kom meðal annars fram að henni hefði ekki verið kunnugt um umrædda ferð. Hún sagðist ekki vita hvort sendinefnd á vegum utanríkisráðuneytisins hefði verið með í för.

„Eins og ég hef skilið þessa ferð best var hann þarna að ræða við þá á Möltu um ýmislegt sem snertir aðild að Evrópusambandinu. Ég tel það ekkert óeðlilegt ekki síst vegna þess að þessi mál eru til mikillar umræðu hér á landi," sagði Jóhanna.

Steingrímur J. Sigfússon fjármálaráðherra var einnig spurður út í ferð Össurar eftir ríkisstjórnarfundinn og sagðist hann ekki gera neinar athugasemdir við hana.

„Hann kom allavega til baka í mjög góðu skapi," sagði Steingrímur rétt áður en hann gekk á brott.