Missti af fluginu til London

„Hann var mjög svekktur og ég auðvitað líka,“ segir fyrirsætan og neminn Kristrún Ösp Barkardóttir.

Fréttablaðið greindi frá því á laugardag að Kristrún væri á leiðinni til Bretlands að hitta fótboltakappann Dwight Yorke og ætluðu þau að fagna nýrri ævisögu kappans sem kom út í síðustu viku. Hann ætlaði að taka á móti henni í London og þau ætluðu að eyða helginni saman, en íslenska veðráttan varð til þess að hún missti af fluginu út.

„Ég þorði ekki að keyra suður,“ segir Kristrún, sem býr á Akureyri. Mikil hálka var á Holtavörðuheiði og nokkrir bílar fóru út af. Hún átti flug til London snemma um morguninn svo að hún gat ekki farið frá Akureyri til Reykjavíkur með flugi á laugardag.

Kristrún býst þó við að hitta Yorke á næstunni og er hann búinn að lofa því að bjóða henni út þegar hann snýr aftur úr Karíbahafinu, en þangað hélt hann í gær.

Ævisaga Yorke hefur vakið mjög mikla athygli í Bretlandi og þá sérstaklega ummæli hans um glamúrmódelið og athafnakonuna Jordan. Þau áttu í ástarsambandi á árum áður og eiga saman soninn Harvey. Yorke lýsir sambandi þeirra í smáatriðum og gagnrýnir hana fyrir að leyfa sér ekki að umgangast son sinn.