Reikningur frá brúðkaupi aldarinnar fyrir dóm

Viðburðafyrirtækið Élan productions hefur höfðað skuldamál á hendur Jóni Ásgeiri Jóhannessyni og Ingibjörgu Pálmadóttur vegna brúðkaups þeirra sem fyrirtækið skipulagði. Málið verður tekið fyrir í Héraðsdómi Reykjavíkur á fimmtudaginn. Einar Þór Sverrisson, lögmaður þeirra hjóna, sagði í samtali við Fréttablaðið að málið snerist um lokagreiðslu og það væri ágreiningur um uppgjör.

Eiríkur Gunnsteinsson, lögmaður Élan hér á landi, vildi lítið tjá sig um málið. Hann vildi ekki gefa upp hversu háar fjárhæðir væri um að ræða og útilokaði ekki að samið yrði um málið utan dómstóla. Í sama streng tók Einar og bætti við að ekki væri um verulegar fjárhæðir að ræða, búið væri að borga alla aðra reikninga.

Brúðkaup Jóns Ásgeirs og Ingibjargar vakti mikla athygli en þau giftu sig 17.nóvember í Fríkirkjunni fyrir tveimur árum. Élan sá um alla skipulagningu brúðkaupsins og í frétt Fréttablaðsins kom fram að starfsfólk fyrirtækisins hefði flutt heilmargt inn í tilefni af brúðkaupinu, allt frá blómaskreytingum til kokka. Garðar Thor söng fyrir gesti Fríkirkjunnar en hún hafði verið haganlega skreytt í takt við stíl og smekk brúðhjónanna. Séra Hjörtur Magni gaf þau saman.

Glæsilegur Rolls Royce-Phantom ferjaði hin nýgiftu hjón yfir í Hafnarhúsið þar sem sungið var og trallað langt fram á nótt undir taktföstum slætti Gus Gus.

Nánast allir forkólfar viðskiptalífsins mættu til að samgleðjast þeim, nægir þar að nefna Hreiðar Má, Hannes Smárason, Lárus Welding og Björgólf Guðmundsson.