Mark Wahlberg leikur í Reykjavík-Rotterdam

Hollywoodstjarnan Mark Wahlberg mun leika í endurgerð á myndinni Reykjavík-Rotterdam, að því er fullyrt er á vef The Hollywood Reporter. Þar kemur fram að handritshöfundurinn Aaron Guzikowski muni skrifa handritið að enskri útgáfu myndarinnar en Baltasar Kormákur muni leikstýra.

Það voru þeir Arnaldur Indriðason og Óskar Jónasson sem skrifuðu upphaflega handritið að myndinni en hún fjallar um öryggisvörð og sjómann sem á í mestu erfiðleikum með að halda sér réttu megin við lögin.

Baltasar Kormákur framleiddi frumútgáfuna af Reykjavík-Rotterdam og á réttinn af enskri útgáfu myndarinnar.