Loðna finnst á mjög stóru svæði fyrir austan

Vart hefur orðið við loðnu á mjög stóru svæði úti fyrir Norðausturlandi og norðanverðum Austfjörðum í loðnuleitinni sem nú stendur yfir og ljúka átti í dag.

Albert Sveinsson, skipstjóri á Faxa RE, segir í samtali við heimasíðu HB Granda að ákveðið hafi verið skipið verði heldur lengur við loðnuleit en ráð var fyrir gert en að öllu forfallalausu ætti því verkefni að ljúka fyrri hluta dags á morgun.

,,Við vorum beðnir um að bæta við okkur leitarleggjum og fara betur inn í svæðið á milli þeirra leggja sem við höfum þegar lagt að baki. Þá förum við einnig austar og norðar en upphaflega var ákveðið," sagði Albert er rætt var við hann nú eftir hádegið.

Leitarsvæði Faxa RE er út af Norðausturlandi, Lundey NS leitaði á svæðinu úti fyrir Norðurlandi, vestan við Faxa RE, og Börkur NK hefur leitað af loðnu úti fyrir Austfjörðum. Hafrannsóknaskipið Árni Friðriksson RE hefur verið við Suðausturland en þar hefur ekki orðið vart við loðnu á þessum árstíma svo vitað sé.

,,Þetta hefur gengið ágætlega. Við urðum strax varir við loðnu þegar við komum á hina hefðbundnu veiðislóð norðaustur af Langanesi og það er alls staðar loðnu að finna á því svæði. Lundey NS fann einhverja loðnu vestan við okkar svæði og Börkur NK hefur verið í loðnu á sínu svæði þannig að ljóst er að loðnan heldur sig á mjög stóru svæði," segir Albert en hann upplýsir að víða hafi verið fínar lóðningar og loðnan, sem veiðst hafi, sé mjög góð.

,,Þetta eru samt ekki eiginlegar veiðar. Við rétt dýfum trollinu og hífum um leið og það kemur í lóðið. Þetta eru örstutt hol og tilgangurinn er sá að afla sýna fyrir Hafrannsóknastofnunina," segir Albert en að hans sögn reiknar hann með því að framlengingin á loðnuleit Faxa RE samsvari rúmlega 100 sjómílum. Gangi allt að óskum ætti að vera hægt að ljúka verkinu á 15 til 16 tímum.