Hæstiréttur staðfestir vanhæfi dómara

Hæstiréttur Íslands staðfesti úrskurð Héraðsdóms Reykjavíkur í gær um að Sigríður Ingvarsdóttir, dómari við Héraðsdóm Reykjavíkur, viki sæti í máli Guðmundar Kristjánssonar gegn Árna Mathiesen, fyrrverandi fjármálaráðherra og íslenska ríkinu. Það voru Verjendur Árna og ríkisins sem kröfðust þess að Sigríður viki.

Guðmundur sótti um embætti héraðsdómara við Héraðsdóm Norðurlands eystra og Héraðsdóm Austurlands. Sérstök matsnefnd mat Guðmund hæfari en Þorstein Davíðsson, en Þorsteinn var engu að síður skipaður í embættið. Guðmundur ákvað því að stefna íslenska ríkinu og Árna Mathiesen sem var settur dómsmálaráðherra við skipunina.

Stefndu í málinu kröfðust þess að dómari viki sæti vegna ummæla sem hún viðhafði í útvarpsþætti á Rás 2 og var fallist á það í úrskurði sem kveðinn var upp í morgun.

Skipan Þorsteins Davíðssonar vakti töluverða athygli á sínum tíma en hann er sonur Davíðs Oddssonar fyrrverandi forsætisráðherra.

Guðmundi er einnig gert að greiða málskostnað ríkis og Árna, hvorum um sig 75 þúsund krónur.