Stórbruni í Vestmannaeyjum

Lifrarsamlagið í Vestmannaeyjum varð alelda í nótt og berst allt tiltækt slökkvilið í eyjunum nú við brunann við erfiðar aðstæður. Eldurinn kom upp um klukkan fjögur og er þakið af elsta húsinu sem byggt var 1932 hrunið og eldur er í viðbyggingum að sögn lögreglu. Slökkvilið telur sig nú hafa náð tökum á eldinum.

Um eina samfellda byggingu er að ræða en við hana hefur verið byggt mikið í gegnum árin sem gerir slökkvistarf erfitt aðen veðuraðstæður eru sæmilegar þrátt fyrir töluverðan vind. Slökkviliðið hefur einnig notið aðstoðar lögreglu og björgunarsveitar við slökkvistarfið og hafa um fimmtíu manns barist við eldinn frá því í nótt.

Að sögn lögreglu er alls óvíst um eldsupptök á þessari stundu en engin starfsemi var í húsinu í nótt og því engin tæki í gangi. Á tímabili var óttast að eldurinn næði að læsa sig í annað hús sem stendur nærri en slökkviliðið telur sig hafa komið í veg fyrir það.

Miklar lýsisbirgðir eru í Lifrarsamlaginu og eldsmatur því mikill.