Eðlilegt að skattahækkanir skili sér strax í bensínverð

Forstjóri N1 segir eðlilegar skýringar á því að skattahækkanir á bensíni skili sér svo fljótt inn í bensínverðið. Neytendatofa sendi olíufélögunum fyrirspurn vegna málsins í gær.

Eins og fram kom í fréttum okkar í gær ákvað neytendastofa að senda olíufélögunum formlegar fyrirspurnir vegna fjölda ábendinga frá neytendum um að skattahækkun á bensíni hafi skilað sér samdægurs inn í bensínverð. Neytendur spurðu sig hvers vegna sambærileg skattahækkun á áfengi skilaði sér ekki inn í verðið fyrr en nýjar birgðir kæmu til landins en bensínið hækkaði strax.

Hermann Guðmundsson forstjóri N1 segir eðlilegar skýringar á þessu og að fyrirspurn neytendastofu sé byggð á misskilningi. Olíufarmar séu tollafgreiddir til bráðabirgða og vörugjaldið greitt einu sinni í mánuði í hlutfalli af sölu

Hann segir það vera þannig að ríkið breyti sinni verðskrá samdægurs. Fyrirkomulagið hafi verið svona og menn hafi ekki talið sanngjarnt að eitt fyrirtæki á markaði hafi forskot með því að eiga birgðir. Hann segir þetta fyrirkomulag hafa verið sett á fyrir mörgum áratugum og hafi ekki valdið misskilningi fyrr en núna.