Ríkið hirðir ábatann af lægri greiðslubyrði

Lækkun á greiðslubyrði heimilanna er fagnaðarefni. Skattahækkanir ríkisstjórnar­innar kosta um það bil ein mánaðar­lán á ári. Skattahækkanirnar taka þann ábata sem lægri greiðslubyrði skilar.

Þetta sagði Tryggvi Þór Herbertsson, þingmaður Sjálfstæðisflokksins, í umræðum um stöðu heimilanna á Alþingi í gær.

Fagnaði hann aðgerðum félagsmálaráðherra og sagði skattahækkunaráformin ekki honum að kenna, nema að hluta til.

Guðmundur Steingrímsson Framsóknarflokki sagði marga kalla eftir leiðréttingu skulda. Aðgerðum ráðherra bæri að fagna, sér í lagi vegna þess að þær væru almennar. Óvissa ríkti þó um raunverulegt virði lána og henni þyrfti að eyða. Lagði hann til að ráðist yrði í lækkun höfuðstóls lána.

Árni Páll Árnason félagsmálaráðherra sagði að við hefði blasað að um tuttugu þúsund hefðu farið í gjaldþrot. Um væri að ræða fólk sem hefði áfram sömu eða svipaðar tekjur og fyrir hrun en skuldabyrðin hefði vaxið því yfir höfuð.

Hann sagði almennar aðgerðir mæta vanda þessa fólks en það væri á hendi bankanna að veita sértæk úrræði þeim sem þau þyrftu með.

Unnur Brá Konráðsdóttir Sjálfstæðisflokki harmaði að ríkisstjórnin hefði ekki farið að tillögum flokks síns frá í sumar. Sagði hún mikilvægt að allir kæmu saman að lausn mála og til hliðsjónar yrði meðal annars sú ríka hefð að Íslendingar byggju í eigin húsnæði.

Lilja Mósesdóttir VG sagðist berjast fyrir leiðréttingu höfuðstóls lána og um leið afnámi verðtryggingar. Um leið yrði að efla leigu- og kaupleigukerfi húsnæðis.

Margrét Tryggvadóttir Hreyfingunni sagði boðaðar aðgerðir skref í rétta átt en stíga þyrfti stærri skref.

Undir lok umræðunnar þóttist Guðmundur Steingrímsson greina samhljóm meðal þingmanna og ítrekaði þá skoðun sína að lækka bæri höfuðstól húsnæðislána. Auk þess að gagnast heimilunum myndi það koma sér vel fyrir efnahags­lífið.bjorn@frettabladid.is