Karlmaður um þrítugt á gjörgæslu með svínaflensu

Karlmaður um þrítugt liggur á gjörgæsludeild Landspítalans vegna H1N1 inflúensunnar. Bólusetning forgangshópa hefst innan fárra daga.

Samkvæmt upplýsingum frá Þórólfi Guðnasyni, yfirlækni á sóttvarnasviði hjá Landlæknisembættinu, liggja 13 manns á sjúkrahúsi vegna H1N1 inflúensu - svonefndrar svínaflensu - þar af þrír á gjörgæslu. Um er að ræða fólk á miðjum aldri, en einn maður á gjörgæslu mun vera um þrítugt. Inflúensan getur valdið miklum bólgum í lungum og þeir sjúklingar sem hefur þurft að leggja á gjörgæslu hafa þurft á öndunaraðstoð að halda. Nær allir sjúklingarnir eru með undirliggjandi sjúkdóma sem veikja ónæmiskerfið.

Þórólfur segir heilbrigðisyfirvöld eðlilega hafa áhyggjur, reynsla annarra þjóða sýni að ekki þurfi marga mjög inflúensuveika einstaklinga til að hreinlega lama gjörgæsludeildir. Af þeim sökum liggi á að hefja bólusetningu. Eins og fram hefur komið berast fyrstu 15 þúsund skammtarnir af bóluefni til landsins á fimmtudag og hefst bólusetning forgangshópa í framhaldi af því.

Fregnir berast af því að mikið sé um forföll nemenda og kennara í skólum landsins. Þórólfur segir það vera líkt og spár um útbreiðslu gerðu ráð fyrir. Það væri hins vegar enginn tilgangur í að loka skólum eða mannmörgum samkomustöðum nú til að hefta útbreiðslu flensunnar, því hún sé komin það mikið á skrið.