Noregsferð gekk vonum framar

Sigmundur Davíð Gunnlaugsson, formaður Framsóknarflokksins, segir Noregsferð sína og Höskuldar Þórhallssonar þingmanns hafa gengið vonum framar. Viðbrögð við hugmyndum um lánalínu frá Noregi hafi verið mjög jákvæð, helst hafi fulltrúar Verkamannaflokksins verið hlédrægir. Þetta kom fram í bréfi sem Sigmundur sendi flokksfélögum sínum.

Þar segist formaðurinn hissa á umfjöllun fjölmiðla um förina. Gert hafi verið tortryggilegt að tveir þeirra fjármálasérfræðinga sem voru með í förinni ættu sæti í stjórn fjárfestingarsjóðs. Sjóðurinn sé í eigu fjögurra lífeyrissjóða með sextíu þúsund félagsmenn og hafi náð góðum árangri. „Ef óhróðursdeildir stjórnvalda (og fjölmiðlar) ætla að gera allt slíkt tortryggilegt er lítil von til þess að landið rétti úr kútnum,“ segir Sigmundur í bréfinu.

Þá sakar hann „spunaverksmiðju Samfylkingarinnar“ um að hafa rangtúlkað förina og aðkomu sérfræðinganna tveggja. Sigmundur segist þó vanur bloggurum Samfylkingarinnar, „orðbragði þeirra, ósannindum og ósvífni“.

Þá segir Sigmundur það skyldu Framsóknarmanna að tryggja að gera Ísland að samfélagi faglegra vinnubragða, raunverulegrar verðmæta­sköpunar og uppbyggilegrar rökræðu.- kóp