Biluð umferðarljós við gatnamót Breiðholtsbrautar

Umferðarljós gatnamóta Breiðholtsbrautar og Jaðarsels verða óvirk frá miðvikudagsmorgni í allt að þrjá daga vegna framkvæmda. Endurnýja þarf stjórnkassa og einnig verður umferðarljósunum sjálfum skipt út, en sett verða svokölluð díóðuljós sem eru bjartari og skýrari fyrir akandi og gangandi umferð.

Á miðvikudagsmorgunn kl. 9:30 að loknum annatíma morgunumferðar verða umferðarljósin á gatnamótum Breiðholtsbrautar og Jaðarsels gerð óvirk tímabundið til föstudags.

Til að draga úr hættu á gatnamótunum verður lokað fyrir almenna umferð frá Jaðarseli inn á Breiðholtsbraut. Einnig verða allar vinstri beygjur af Breiðholtsbraut á þessum gatnamótum bannaðar tímabundið, sem og vinstri beygja frá Suðurfelli inn á Breiðholtsbraut.

Meðan ljósin eru óvirk er hámarkshraði umferðar 30 km á klst. Lögreglan verður með viðbúnað á annatíma. Strætó mun bæta inn vögnum til að tímaáætlanir riðlist sem minnst. Breytingar verða tímabundið á leiðum 3 og 12, og eru þær kynntar sérstaklega á heimasíðu Strætó, bus.is, og í viðkomandi biðskýlum.