Ekki komin niðurstaða í Icesave

Eftir því sem fréttastofa kemst næst er ekki komin niðurstaða um lendingu með Bretum og Hollendingum í Icesave málinu og heimildir fréttastofu herma að ríkisstjórnin sé ekki tilbúin með nýtt frumvarp um ríkisábyrgð sem viðsemjendurnir eru tilbúnir til að fallast á.

Steingrímur J. Sigfússon fjármálaráðherra segir í samtali við Fréttablaðið að viðræður gangi vel og að búast megi við niðurstöðu í dag eða á næstu sólarhringum.

Nú styttist í að innlánstryggingasjóður þurfi að standa skil á Icesave skuldinni en kröfur Breta og Hollendinga verða virkar þann 23. október næstkomandi. Því ríður á fyrir ríkisstjórnina að leggja fram nýtt frumvarp um ríkisábyrgð og koma því í gegnum Alþingi.