Hugmyndin galin segir talsmaður LL

Mikill ávinningur yrði af því að greiða upp skuldbindingar ríkisins vegna Icesave með láni frá lífeyrissjóðunum, að mati Viðskiptaráðs Íslands. Hugmyndin er galin, segir Hrafn Magnússon, framkvæmdastjóri Landssambands lífeyrissjóða (LL).

„Aðkoma lífeyrissjóðanna í endur­reisninni getur bæði verið fjölþættari og umfangsmeiri,“ segir í nýju áliti Viðskiptaráðs Íslands. Finna megi leið til að sjóðirnir geti komið að samningaborðinu við lausn Icesave-deilunnar.

„Mikill ímyndarlegur ávinningur væri fólginn í því að greiða upp skuldbindingar með láni ríkissjóðs frá lífeyrissjóðunum. Að sama skapi eru hagsmunir sjóðanna og hins opinbera samtvinnaðir á ýmsan máta og því mun betra að lífeyris­sjóðir væru mótaðili slíks lánasamnings en erlendir ríkissjóðir,“ segir í álitinu.

„Þetta er alveg galin hugmynd,“ segir Hrafn. Hann segir miklu skipta fyrir lífeyrissjóðina að vera með hluta eigna sinna erlendis. Í lok ágúst námu eignir erlendis samtals 515 milljörðum króna. Með því að lána ríkinu svo mikið fé verði í raun gegnumstreymi í lífeyrissjóðunum, áhættan stóraukist og mögulega þurfi að skerða réttindi sjóðsfélaga. Þá verði raunveruleg hætta á því að lífeyrissjóðirnir verði þjóðnýttir.

Viðskiptaráð nefnir fleiri leiðir til að nýta lífeyrissjóðina, til dæmis til að flýta fyrir afnámi gjaldeyris­hafta og lækkun stýrivaxta. „Með skattlagningu inngreiðslna má mýkja aðlögun ríkisfjármála. Framkvæmdir á vegum sjóðanna geta að sama skapi vegið upp á móti minna útgjaldasvigrúmi hins opinbera og þannig stutt við eftirspurn og atvinnustig,“ segir í tilkynningu ráðsins.

Hrafn segir tillögurnar greinilega afrakstur hugarflugsfundar hjá Viðskiptaráði, og stangist raunar að vissu leyti á. Talað sé um að lífeyrissjóðirnir komi að uppbyggingu samhliða því sem lagt sé til að skattur verði lagður á inngreiðslur, sem myndi draga verulega úr afli sjóðanna. - bj, óká