Sex líkamsárásir - einn nefbrotinn

Sex líkamsárásir voru tilkynntar til lögreglunnar um helgina en fjórar þeirra áttu sér stað í miðborg Reykjavíkur aðfaranótt sunnudags. Allar voru þær minniháttar og ekki er vitað til þess að fólk hafi orðið fyrir alvarlegum meiðslum að sögn lögreglu.

Reyndar nefbrotnaði maður eftir átök á skemmtistað en það eru engin stórtíðindi að mati lögreglunnar á höfuðborgarsvæðinu.

Skemmtanhald helgarinnar fór almennt vel fram og flestir fóru ánægðir til síns heima.

Þá segir lögreglan að meira að segja tveir slagsmálahundar sem voru skildir að í miðborginni hafi farið saman af vettvangi. Var engu líkara en þar væru bestu vinir á ferð.