Þú deyrð af að senda SMS

Sexþúsund Bandaríkjamenn deyja árlega vegna þess að þeir freistast til að senda SMS meðan þeir eru að keyra bíl samkvæmt nýrri rannsókn þar í landi. Bílstjórarnir eru flestir undir tvítugsaldri.

Samkvæmt könnuninni er tuttugu og þrisvar sinnum líklegra að þú deyir í umferðinni ef þú ert að senda SMS.

Í mörgum löndum er bannað að tala í farsíma undir stýri nema með handfrjálsum búnaði. Í lögunum eru SMS skilaboð hinsvegar ekki nefnd þar sem lögin voru í flestum tilfellum sett áður en SMS varð að því æði sem það er í dag.

Það er þó nokkuð ljóst að það tekur enn meiri athygli frá akstrinum að senda slík skilaboð en að tala í símann.

Það gerir svo málið enn alvarlegra að nú er tölvupóstur einnig kominn í farsíma. Mörg fylki Bandaríkjanna hafa þessvegna bætt SMS skilaboðum inn í gömlu lögin.

Runólfur Ólafsson framkvæmdastjóri FÍB segir að í íslenskum lögum sé bannað að tala í farsíma nema með handfrjálsum búnaði. Einnig sé bannað að iðka nokkra þá iðju sem dragi athygli frá akstrinum.

Strangt til tekið hljóti SMS skilaboð að falla undir það. Hinsvegar sé SMS ekki nefnt berum orðum í lögunum.

Runólfur telur sjálfsagt að skerpa á þessu enda hafi orðið slys hér á landi sem tengist sendingu SMS.