Íbúðalán dragast saman um helming

Þótt útlán Íbúðalánasjóðs hafi aukist á milli mánaða í septem­ber er samdráttur milli ára. Samkvæmt tölum sjóðsins námu heildarútlán ríflega 2,9 milljörðum króna í septem­ber, þar af voru um 1,8 milljarðar í almenn útlán og 1,1 milljarður vegna leiguíbúðalána.

Útlán Íbúðalánasjóðs jukust því um 84 prósent milli ágúst og september og er aukningin að mestu rakin til aukinna leiguíbúðalána. „Hins vegar hefur Íbúðalánasjóður veitt útlán fyrir rúma 24,4 milljarða króna það sem af er ári sem er helmingi minna en á sama tímabili í fyrra,“ segir í umfjöllun Hagsjár hagfræði­deildar Landsbankans.

„Umsóknir vegna greiðslu­erfiðleika hafa margfaldast sé það sem liðið er af árinu borið við sama tímabil í fyrra. Alls hafa sjóðnum borist tæplega 2.500 umsóknir eða ríflega fimmfalt fleiri en á sama tímabili í fyrra,“ segir í Hagsjá.

Þá bendir hagfræðideild bankans á að útgáfuáætlun sjóðsins beri merki samdráttar í útlánum. „Í lok síðasta mánaðar tilkynnti sjóðurinn að ekkert yrði af fyrir­huguðum útboðum á þriðja ársfjórðungi en samkvæmt áætlun átti þá að gefa út íbúðabréf að upphæð sjö til níu milljarðar króna.“ Búist er við endurskoðaðri útgáfuáætlun Íbúðalánasjóðs á næstu dögum. - óká