Hafa rannsakað 250 mál frá bankahruni

Samkeppniseftirlitið hefur gert fjórar húsleitir frá bankahruninu í fyrra. Ein húsleitanna varðar grun um misnotkun á markaðsráðandi stöðu og þrjár varða grun um ólögmætt samráð.

Þetta kemur fram í nýjum pistli Páls Gunnars Pálssonar, forstjóra Samkeppniseftirlitsins, sem birtist á vef stofnunarinnar. Þar kemur jafnframt fram að Samkeppniseftirlitið hefur rannsakað 250 mál frá byrjun október á síðasta ári. 120 þeirra séu enn í gangi en 130 sé lokið.

Þá hafa átta fyrirtæki eða samtök fyrirtækja verið sektuð um samtals 460 milljónir íslenskra króna. Hæsta sektin var ákveðin vegna misnotkun Haga á markaðsráðandi stöðu, en hún nam 315 milljónum króna. Ákvörðunin var staðfest í úrskurði áfrýjunarnenfndar samkeppnismála en Hagar hafa stefnt Samkeppniseftirlitinu fyrir dóm vegna málsins.