Upplýsir ekki hvort Eykt hafi stutt sig

Óskar Bergsson, formaður borgarráðs, upplýsir ekki hvort verktakafyrirtækið Eykt hafi stutt sig í prófkjörsbaráttu Framsóknarflokksins árið 2006. Óskar telur nauðsynlegt að leikreglur kjörinna fulltrúa séu skýrar.

Ólafur F. Magnússon, borgarfulltrúi F-listans, spurðist fyrir um tengsl Óskars við Eykt í tilkynningu í morgun. Jafnframt spurði Ólafur hvort að Óskar hafi þegið beinar greiðslur frá félaginu eða öðrum hagsmunaaðilum í byggingariðnaði.

Óskar staðfestir að hann hafi fengið styrki frá fyrirtækjum og einstaklingum í prófkjörsbaráttu sinni líkt og flestir frambjóðendur í aðdraganda borgarstjórnarkosninganna árið 2006.

Kemur úr byggingariðnaðinum

,,Ég staðfesti það að í prófkjörsbaráttu minni, auk þess að ég lagði fram eigið fé, lögðu einstaklingar og fyrirtæki mér lið án þess að ég upplýsi nákvæmlega hverjir það hafi verið eða hversu mikil fjárframlög hafi verið um að ræða frá hverjum og einum," segir Óskar aðspurður hvort Eykt eða aðrir hagsmunaaðilar í byggingariðnaði hafi stutt hann í prófkjörsbaráttunni.

Eins og fram kemur á vefsíðu Reykjavíkurborgar starfaði Óskar hjá Eykt á árunum 1989 til 1993. ,,Ég er húsasmiður og húsasmíðameistari. Þannig að minn uppruni kemur úr byggingariðnaði."

Það séu tengsl hans við hagsmunaaðila í byggingariðnaði.

Telur siðareglur nauðsynlegar

Borgarstjórnarflokkur Framsóknarflokksins hefur haft til meðferðar siðareglur sem lagðar voru fram í borgarráði í desember. Samkvæmt þeim eiga kjörnir fulltrúar að forðast hagsmunaárekstra og gæta þess að fara ekki út fyrir umboð sitt í störfum sínum.

Óskar reiknar með því að borgarstjórnarflokkurinn skili af sér umsögn um siðareglurnar í næstu viku. Hann á síður von á því að framsóknarmenn geri veigamiklar athugasemdir við þær.

„Það er algjörlega nauðsynlegt fyrir alla aðila að leikreglur séu skýrar."