Bankarnir sagðir koma í veg fyrir fasteignaviðskipti

Fasteignasalar óska eftir því að bankar skýri þau sjónarmið sem ráði ákvörðunum þeirra varðandi fasteignalán, veðflutninga og yfirtökur.

Eftir að bankarnir voru ríkisvæddir er ógerningur að gera sér grein fyrir sjónarmiðum bankanna sem geri fasteignasölum og viðskiptavinum þeirra erfitt fyrir. Þetta segja Ólafur Blöndal, eigandi fasteign.is, Óskar R. Harðarson, framkvæmdastjóri Mikluborgar, og Ingibjörg Þórðardóttir, formaður Félags fasteignasala.

„Bankarnir eru allir í ríkiseigu svo það er í hæsta lagi óeðlilegt að þeir hafi ólíka stefnu, hvað þá að hún sé breytileg eftir útibúum,“ segir Ólafur. Samningum sem virðast borðleggjandi sé hafnað af bönkunum og segjast þau ekki sjá á hvaða forsendum. „Hvaða tilgangi þjónar það til dæmis,“ spyr Ólafur, „að hafna fólki sem vill minnka við sig og lækka sínar skuldir með því að selja eign sína og fá ódýrara húsnæði upp í og borga lánið niður með milligjöfinni? Það minnkar við sig, lækkar skuldir, heldur sama veðhlutfalli en er samt hafnað.“

Óskar segist einnig kannast vel við þennan vanda og segir fjögur til fimm nýleg dæmi um slík mál þar sem sínum viðskiptavinum hafi verið hafnað. „Ekki er verið að ganga út frá hagsmunum viðskiptavinarins í slíkum tilfellum,“ segir Óskar.

„Því spyrjum við þeirrar einföldu spurningar hvaða sjónarmið það séu þá sem ráði? Þetta er í hrópandi ósamræmi við það sem Steingrímur J. Sigfússon [fjármálaráðherra] hefur sagt um að bankar ættu ekki að horfa svo mikið í eiginfjárstöðu hjá fólki heldur greiðslugetu þess.“ Þau segja enn fremur að fyrir bankahrun hafi útibússtjórar haft mun meira ákvörðunarvald.

Nú hafi það verið fært en ekki sé alltaf ljóst hvert. Það hafi orðið til þess að afgreiðsla taki mun meiri tíma og oft sé erfitt að fá upplýsingar, til dæmis um forsendur höfnunar.jse@frettabladid.is