Hálf öld á milli yngsta og elsta þjófsins

Yngsti þjófurinn sem lögreglan greip um helgina reyndist vera tólf ára gamall drengur en hann varð uppvís af búðarþjófnaði í verslunarmiðstöð á höfuðborgarsvæðinu samkvæmt lögreglunni á höfuðborgarsvæðinu.

Fjörtíu og átta ár skilur á milli hans og elsta búðarþjófsins sem var gripinn um helgina. Það  reyndist vera sextug kona. Að sögn lögreglunnar sækja þjófarnir mikið í snyrtivörur sem og matvörur og sælgæti. Unglingarnir sækjast helst í það síðastnefnda.

Af öðrum þjófnaðarmálum má nefna að þvotti var stolið úr þvottahúsi fjölbýlishúss í borginni. Grunur beindist fljótt að ákveðnum aðila og viðurkenndi sá verknaðinn. Kom einnig á daginn að viðkomandi hafði áður stolið úr sama þvottahúsi.

Þá voru þrír dekkjaþjófar gripnir í Reykjavík eldsnemma morguns en þeir voru sakleysið uppmálið þegar lögreglan kom á vettvang. Í bíl þeirra fannst hinsvegar sitthvað athugunarvert, það er fíkniefni og þýfi.

Í framhaldinu var farið í húsleit á heimili eins þeirra og þar fundust fleiri munir sem þremenningarnir áttu erfitt með að gera grein fyrir.