Hækkun gjalda hefur óhjákvæmilega neikvæð áhrif

Gjöld á bíla, eldsneyti, áfengi og tóbak hækka um tíu til fimmtán prósent, samkvæmt stjórnarfrumvarpi sem lagt verður fram á Alþingi í kvöld. Fjármálaráðherra segir að ekki verði hjá því komist að hækkun gjalda hafi neikvæð áhrif á verðlagið.

Hugmyndir um tekjuöflun og niðurskurð til að mæta gríðarlegum fjárlagahalla voru kynntar þingflokkum Samfylkingar og Vinstri grænna í gærkvöldi. Hækkun tekjuskatts hefur verið rædd og í kvöld verður lagt fram á Alþingi stjórnarfrumvarp sem gerir ráð fyrir 10% hækkun bifreiðagjalds og 15% hækkun gjalda á tóbak og áfengi. Tíu króna hækkun verður á bensíngjaldi, olíugjald hækkar um fimm krónur, en kílómetragjald lækkar aftur á móti um 20%.

Næsta víst er að landsmenn muni áfram kaupa þessa vöruflokka þrátt fyrir verðhækkun - en ljóst er að hækkunin fer beint út í verðlagið, togar upp vísitölu neysluverðs og verðtryggð lán - og þrengir því enn skuldastöðu heimilanna.

„Jú, það er að sjálfsögðu neikvætt að því fylgi neikvæð verðlagsáhrif. En undan því verður ekki vikist. Það eru fáir og í raun engir góðir kostir í stöðunni. Þetta er val á milli erfiðra leiða til að reyna að ná tökum á hallanum á ríkissjóði og byrja að ná þar endum saman," segir Steingrímur J. Sigfússon, fjármálaráðherra.

Hækkun vörugjalda á að skila um fimm milljörðum til ríkisins á ári.