Seðlabankastjóri fær tæpar 1600 þúsund á mánuði

Svein Harald Øygard fær greiddar 1575 þúsund krónur í laun á mánuði. Lára V. Júlíusdóttir, formaður bankaráðs Seðlabankans, segir að þetta séu sömu laun og Davíð Oddsson, fyrrverandi bankastjóri hafði.

Greint var frá því í fjölmiðlum um síðustu áramót að laun Davíðs væru 1.294 þúsund krónur. Lára segir hins vegar að Svein sé á nákvæmlega sömu launum og Davíð var á. „Þegar þú skoðar laun fyrrverandi bankastjóra að þá er eitthvað sem heitir fastalaun og greiðslur fyrir þetta og hitt. Þannig að þegar allt var komið þá var þetta summan," segir Lára. Hún segir að rætt hafi verið um það við Svein þegar að hann hóf störf að hann gengi inn í þau laun sem fyrrverandi bankastjóri var á.

DV greinir frá því í dag að Seðlabanki Íslands greiði flugfar fyrir fjölskyldu Sveins til Íslands á sex vikna fresti. „Þetta er bara partur af samningnum sem við hann var gerður," segir Lára. Hún bendir þó á að hún viti ekki til þess að fjölskyldan hafi komið hingað til lands. Svein hafi því ekki nýtt sér þennan hluta samkomulagsins. Þá segir Lára að Seðlabankinn greiði af íbúð fyrir Svein. „Það er bara það eins og eðlilegt er þar sem hann er búsettur erlendis," segir Lára.

Upplýst hefur verið um það í fjölmiðlum að bankastjórar Kaupþings og Íslandsbanka séu með 1750 þúsund krónur á mánuði en bankastjóri Landsbankans með 1500 þúsund.