Talning hafin á kjörfundi framsóknarmanna

Kosningu um oddvitasæti á lista framsóknarmanna í komandi borgarstjórnarkosningum lauk á 12 tímanum og er talning atkvæða hafin. Kjörfundur fer fram á Hótel Loftleiðum og berjast Einar Skúlason, varaþingmaður og fyrrverandi framkvæmdastjóri þingflokks framsóknarmanna, og Óskar Bergsson, borgarfulltrúi og formaður borgarráðs, um fyrsta sætið.

Jóhanna Hreiðarsdóttir, upplýsingafulltrúi flokksins, segir að úrslit verði kynnt strax að lokinni talningu í hádeginu.

Á kjörfundinum verður kosið í sex efstu sæti listans með meirihlutakosningu og í sæti 7 til 12 með prófkjörsleið. Niðurstöður valsins eru bindandi. Atkvæðisrétt hafa félagsmenn í Framsóknarfélögunum í Reykjavík.

Kosið er í sex efstu sætin með meirihlutakosningu sem fer þannig fram að kosið er um hvert sæti fyrir sig. Fyrst er kosið um fyrsta sætið. Ef tveir bjóða sig fram er kosið á milli þeirra þannig að sá sem fær fleiri atkvæði hlýtur sætið. Ef þrír eða fleiri bjóða sig fram er kosið milli allra frambjóðenda og ef enginn þeirra hlýtur meira en 50% gildra atkvæða er kosið aftur milli þeirra tveggja sem flest atkvæði hlutu í fyrri umferð. Hlýtur sá sem fær fleiri atkvæði viðkomandi sæti. Sama aðferð er viðhöfð í sæti 2 til 6. Ef frambjóðandi nær ekki því sæti sem hann sóttist eftir getur hann boðið sig fram í önnur sæti á kjörfundinum.