Hátíð bókmenntanna

Á morgun hefst Bókmenntahátíð í Reykjavík í níunda sinn með hátíðlegri samkomu í Norræna húsinu. Þar liggja um margt rætur hátíðarinnar og hefur húsið ásamt Iðnó lengst af verið aðalvettvangur hátíðarinnar, sem er alltaf fjölsótt af hundruðum áhugamanna um það sem í bókum stendur.

Dagskráin á þessari níundu hátíð bókmenntamanna er að vanda viðamikil. Hádegisviðtöl í Iðnó, spjall í eftirmiðdaginn í Iðnó og húslestrar nokkurra höfunda á kvöldin við Tjörnina eru fyrir löngu orðnir fastir liðir og hafa forstöðumenn hátíðarinnar þráast við að færa hana í stærri hús, þótt aðsóknin sé alltaf mikil og oft þröngt setið og staðið þegar áhugaverðir höfundar eru á ferðinni. Eins og oft áður eru haldnir nokkrir fyrirlestrar á hátíðinni og verða þeir ýmist á hinu nýja Háskólatorgi eða í Hátíðasal Háskólans.

Enginn kostur er að gera grein fyrir allri dagskránni í stuttri blaðagrein, en rétt er að benda áhugasömum á vefsíðu hátíðarinnar þar sem dagskrá með ítarupplýsingum liggur fyrir. Þá hefur nýtt hefti Tímarits Máls og menningar verið tileinkað hátíðinni og hluta af gestum hennar. Það fæst í öllum betri bókaverslunum.

Á laugardaginn eftir viku verður þing helgað útgefendum í Norræna húsinu þar sem þræðir inn í framtíðina verða reifaðir: Kristján B. Jónasson, Heiko Strunk, Helga Frese-Resch, Chad Post og Alexander Schwarz leita framtíðar bókaútgefenda, jafnvel bókarinnar, í breyttum heimi.

Þann sama dag verður heill dagur í dagskránni helgaður ljóðinu: hingað koma að vestan ljóðskáld á vegum kanadísku Griffin-ljóðaverðlaunanna og stendur dagskráin yfir frá 13-17.

Þar munu skáld sem þegið hafa verðlaunin lesa ljóð sín, en ljóð allra skálda sem taka þátt hafa verið þýdd og verður þýðingunni varpað á skjá jafnóðum á meðan á lestrinum stendur. Griffin-skáldin eru hvert öðru magnaðra og í hópnum er til dæmis Michael Ondaatje. Í tengslum við komu Griffin-skáldanna til Íslands var ákveðið að gefa út ljóðabók með þýðingum á ljóðum þessara skálda. Ber bókin titilinn Birtan í húminu og koma margir frábærir ljóðaþýðendur að verkinu. Hægt verður að nálgast bókina á öllum atburðum hátíðarinnar sem og í verslunum Pennans.

Tíu íslensk skáld koma fram á hátíðinni, auk hóps spyrla úr ólíkum stéttum bókamanna. Erlendu gestirnir utan þeirra Griffin-manna eru Kenýamaður, Kanar, Norðmenn og Danir, Finnar og Litháar, Púertóríkanar og Færeyingar, Þjóðverji, Írani og breskur Pakistani. Allt er þetta fólk sem hefur lagt stund á ýmiss konar skrif um samtíma sinn og liðna tíma í ljóðum, sögum, ritgerðum, heimildaverkum og kvikmyndahandritum og nú er að heyra hvað þessir fulltrúar heimsþorpsins hafa að segja þorpurunum í Reykjavík.

pbb@frettabladid.is