AC Milan ekki rætt við Arsenal vegna Adebayor

Umboðsmaður framherjans Emmanuel Adebayor hefur neitað því að AC Milan hafi sett sig í samband við Arsenal vegna mögulegra félagsskipta Tógó-mannsins til Ítalíu.

Adebayor hefur ítrekað verið orðaður við AC Milan undanfarna mánuði þrátt fyrir að hann hafi líst því yfir að hann væri sáttur á Emirates-leikvanginum.

„Ég hitti Arsene Wenger í gær og við töluðum ekki um að Adebayor væri á förum frá félaginu og það liggja heldur engin spennandi kauptilboð á borðinu. Það er ekki rétt að forráðamenn AC Milan hafi sett sig í samband við mig eða Arsenal. Ef það muni gerarst er ómögulegt að segja hvað muni verða, en eins og staðan er núna er Adebayor leikmaður Arsenal," segir Stephane Courbis í samtali við ítalska fjölmiðla.

Silvio Berlusconi, eigandi AC Milan, er yfirlýstur aðdáandi Adebayor og hann hefur sagt að hann vilji endilega fá hann til félagsins í sumar.