Gekk fram á lík á Langasandi

Vegfarandi sem var úti að viðra hundinn sinn gekk fram á lík ungs manns á Langasandi, fyrir neðan elliheimilið á Akranesi, seinni partinn í gær. Ekkert bendir til þess að andlát mannsins hafi borið að með saknæmum hætti en það er þó ekki hægt að útiloka.

Að sögn varðstjóra lögreglunnar á Akranesi var hinn látni skilríkjalaus þegar hann fannst og ekki hafði tekist að bera kennsl á hann þegar Fréttablaðið fór í prentun. Engin tilkynning hafði borist lögreglu um að manneskju væri saknað.

Hinn látni var klæddur og varðstjóri telur að hann hafi ekki verið látinn lengi þegar hann fannst. Ekki mátti sjá á honum teljandi áverka, en líkið var sjórekið og heldur illa farið. Ekki liggur fyrir hve gamall maðurinn er eða hvort hann er íslenskur.

Staðurinn þar sem líkið fannst var girtur af í gær og vettvangurinn rannsakaður.

Varðstjóri segir að næsta skref sé að reyna að bera kennsl á manninn. Síðan taki við rannsókn á dánarorsökinni. - sh