Maradona: Di Maria getur orðið næsta stórstjarna Argentínu

Knattspyrnugoðsögnin og landsliðsþjálfarinn Diego Maradona hjá Argentínu fer fögrum orðum um vængmanninn Angel Di Maria hjá Benfica í nýlegu viðtali.

Maradona telur að hinn 21 árs gamli landsliðsmaður Argentínu hafi alla burði til þess að komast í fremstu röð í heiminum.

„Angel býr yfir hæfileikum til þess að ná mjög langt. Hann gæti orðið næsta stórstjarna Argentínu á næstu árum. Ég hef fylgst vel með ferli hans og hann hefur tekið stórstígum framförum undanfarin ár," segir Maradona.

Benfica hefur einnig mikla trú á Di Maria og hefur sett 40 milljón punda verðmiða á leikmanninn sem hefur verið orðaður við Chelsea undanfarið. Di Maria sýndi til að mynda snilli sína í leik með Benfica gegn Everton á dögunum í 5-0 stórsigri portúgalska liðsins í Evrópudeild UEFA.