Gætum misst unga lækna og hjúkrunarfræðinga úr landi

Gjörbreytt staða er komin upp hjá ungu heilbrigðis­starfsfólki vegna niðurskurðar í heilbrigðiskerfinu. Atvinnumöguleikar nýútskrifaðra lækna og hjúkrunarfræðinga hafa skerst verulega hér á landi og hætta er talin á að þessi hópur þurfi að leita annað í auknum mæli.

Ein þeirra sparnaðaraðgerða sem gripið verður til á Landspítalanum á næstu misserum er að endurnýja ekki tímabundna ráðningarsamninga og ráða ekki í störf þeirra sem hætta vegna aldurs.

„Þetta er vissulega mjög breytt staða og það hefur sannast í gegnum tíðina að þeir sem hafa góða menntun, eða annað sem er eftirsótt annars staðar, fara fyrstir,“ segir Elsa B. Friðfinnsdóttir, formaður Félags íslenskra hjúkrunarfræðinga. Hún segir að finna megi líkindi með þróuninni innanlands á undanförnum árum. Vel menntað fólk flytji af landsbyggðinni til höfuðborgarsvæðisins í leit að tækifærum.

„Fólk skýtur svo rótum í borginni og það sama mun gerast núna. Fólk flytur og kemur ekkert endilega aftur.“ Elsa útilokar því ekki landflótta en setur þann varnagla að ástandið sé heldur ekki gott innan heilbrigðisgeirans annars staðar í Evrópu.

Elsa segir að niðurskurðurinn hitti líka hjúkrunarfræðinema fyrir. „Fjórða árs nemar hafa verið að vinna hlutastörf yfir veturinn og þeir verða trúlega ekki endurráðnir þegar þeirra samningar renna út á næstu mánuðum.“

Hjördís Þórey Þorgeirsdóttir, formaður Félags ungra lækna, segir að líklegt megi teljast að ungir læknar fari fyrr út í sérnám en annars hefði verið og einhverjir komi seinna heim. Það geti þýtt að fleiri setjist að erlendis til frambúðar en annars hefði verið.

Hjördís þekkir dæmi þess að unglæknar séu ráðnir í skemmri tíma en áður, og þá í sex mánuði í stað tveggja ára áður. Einnig sé verið að fækka stöðugildum á sviðum þar sem álagið hafi verið mikið fyrir. „Þetta er það sem við höfum mestar áhyggjur af, að við getum ekki sinnt okkar starfi eins vel og við kysum.“

Hjördís segir að á Landspítalanum hafi starfshópur verið settur á fót sem skoði vinnuframlag ungra lækna.  „Við erum að sinna þannig starfi að það er ekki hægt að minnka vinnuframlag okkar án þess að það geti haft alvarlegar afleiðingar og því er tilkoma starfshópsins sérstakt ánægjuefni.“