Bað veitingamenn afsökunar

Níels S. Olgeirsson, formaður Matvæla- og veitingafélags Íslands, baðst á fimmtudag afsökunar á ummælum sínum um veitingarekstur á Reykjanesi.

Níels hafði í blaði Matvæla- og veitingafélagsins í grein um siðferði í atvinnurekstri sagt að svo virtist sem engin lög giltu á Reykjanesi. Níels viðhafði síðan svipuð ummæli um veitingamenn á Reykjanesi í Fréttablaðinu á þriðjudag og miðvikudag.

Á fimmtudag átti Níels fund með veitingamönnum á Reykjanesi. „Menn töluðu hreinskilnislega saman. Þetta hefur verið eins og hvert annað slys því það nær ekki nokkurri átt að segja að það sé leitun að heiðarlegum fyrirtækjum á Reykjanesi - það er alveg galið," segir Erna Hauksdóttir, framkvæmdastjóri Samtaka ferðaþjónustunnar.

Erna segir veitingmenn búast við yfirlýsingu frá Matvís eftir þennan fund. „Ég á að von á því að það muni heyrast eitthvað frá Matvís í kjölfarið því það kom fram á fundinum að Matvís heldur því langt í frá fram að obbinn af fyrirtækjum á Reykjanesi sé ekki heiðarlegur," segir hún. Níels kvaðst í gær vera að vinna að því að senda eitthvað frá sér um málið en að það væri ekki tilbúið.- gar