Fær ekki að snúa aftur

Jo Wood, fyrrverandi eiginkona Ronnies Wood, hefur staðfest við fjölmiðla að hann sé hættur með hinni barnungu fyrirsætu Ekaterinu Ivanóvu. Jo hefur jafnframt lýst því yfir að Ronnie fái ekki að stíga fæti inn fyrir hennar dyr. „Hann er ekki velkominn aftur,“ sagði Jo í samtali við Daily Mail. Jo og Ronnie, sem er liðsmaður The Rolling Stones, voru gift í 23 ár þegar þau skildu fremur óvænt eftir að Ronnie vildi yngja aðeins upp.

Nýverið var síðan greint frá því að rússneska fyrirsætan og Ronnie ættu ekki skap saman og var stónsarinn meðal annars handtekinn á heimili þeirra eftir að hafa slegið til Ivanóvu. En nú er þetta ástarævintýri Ronnies úti og hann nagar sig eflaust í handarbökin fyrir að hafa eyðilagt svona langlíft hjónaband sem er nú álíka sjaldgæft í skemmtanabransanum og hvítir hrafnar.