Lampard hrósar Joe Cole

Frank Lampard, sem skoraði tvö mörk fyrir Chelsea í dag, var geysilega ánægður með endurkomu Joe Cole í lið Chelsea. Þetta var fyrsti leikur Cole síðan í janúar.

„Hann er í sérklassa. Ég held að allir viti hvað Coley kemur með í liðið, það er alltaf eitthvað sérstakt. Hann hleypur með boltann og getur búið eitthvað til úr engu," sagði Lampard um félaga sinn sem var eðlilega ánægður með að vera kominn aftur.

„Þegar maður er frá í 10 mánuði er stórkostlegt að koma til baka og ég tala nú ekki um í svona frábærum leik," sagði Cole brosmildur.