Þurfa ekki að skila inn vottorðum

Menntamálaráðuneytið sendi í dag stjórnendum framhaldsskóla bréf þar sem lagt er til að nemendur þurfi ekki að skila læknisvottorðum í veikindatilvikum. Sömu tilmælum hefur verið beint til atvinnurekenda.

Þetta er gert að beiðni Haralds Briem, sóttvarnalæknis, sem líkt og greint var frá í gær hefur beint þeim tilmælum til atvinnurekenda og skólastjórnenda að hætt yrði um sinn að krefja starfsfólk á vinnumarkaði og skólanemendur um vottorð vegna veikinda. Fram kemur í tilkynningu að atvinnurekendur og skólastjórnendur eigi að taka fólk trúanlegt þegar það tilkynni veikindaforföll og létta í leiðinni álagi af heilbrigðiskerfinu á meðan inflúensufaraldurinn gengur yfir.

Menntamálaráðuneytið sendi í dag stjórnendum framhaldsskóla bréf í þar sem segir: „Ráðuneytið leggur áherslu á að nemendur í framhaldsskólum þurfi ekki að skila læknisvottorðum í veikindatilvikum. Það verði tilkynnt nemendum í hverjum skóla. Um tímabundnar aðgerðir er að ræða."

Þá sendi Lúðvík Ólafsson, lækningaforstjóri og sóttvarnalæknir höfuðborgarsvæðisins, Samtökum atvinnulífsins erindi þar sem segir: „Um þessar mundir er mikið álag á heilsugæslustöðvar höfuðborgarsvæðisins (Reykjavík, Kópavogur, Hafnarfjörður, Garðabær, Mosfellsbær og Seltjarnarnes) vegna inflúensufaraldurs. Læknar heilsugæslunnar eiga fullt í fangi með að sinna þeim sem þurfa að leita sér lækninga og þurfa því að forgangsraða verkefnum sínum. Af þeim sökum tilkynnist að Heilsugæsla höfuðborgarsvæðisins getur ekki sinnt þessum þætti tímabundið, meðan þetta ástand varir, og bendir atvinnurekendum á að leita annarra leiða við að staðfesta veikindi."