Kátir að vera kallaðir til leiks

„Það er víða sem rætt er um samráð og samstarf við okkur og verkalýðshreyfinguna og það er fagnaðarefni,“ segir Vilhjálmur Egilsson, framkvæmdastjóri Samtaka atvinnulífsins (SA).

Gylfi Arnbjörnsson, forseti Alþýðusambands Íslands, tekur í sama streng. „Ég sé ekki betur en ríkisstjórnin sé að svara kalli vinnumarkaðarins um að setjast niður og vinna á þeim vanda sem við okkur blasir,“ segir hann.

Þeir segja báðir að þegar Evrópusamvandsaðild verði til umræðu muni þeir ekki láta sitt eftir liggja til að vernda hagsmuni atvinnulífsins í þeim samningum.

Það eina sem Vilhjálmur sagðist gjalda varhug við var upptaka aflaheimilda og áform um eignaumsýslufélag ríkisins. Sagði hann fyrningarleiðina valda óvissu við rekstur sjávarútvegsfyrirtækjanna og ekki væri á óvissuþættina bætandi í íslensku rekstrarumhverfi.

Hvað eignaumsýslufélagið varðar segir hann SA frekar hafa viljað að bankarnir tækju fyrirtækin yfir en ríkið og óttaðist hann fákeppni ef þessi leið yrði farin. - jse