Ísraelsk flugvél nauðlenti á Íslandi

Ísraelsk flugvél, á vegum El Al flugfélagsins, nauðlenti á Íslandi í síðustu viku. Vélin var á leið frá Ísrael til Bandaríkjanna, en farþegar dvöldu á Íslandi í tæpan sólarhring vegna bilunar í vélinni.

Í frétt á fréttavefnum Haaretz kemur fram að vélinni hafi verið nauðlent eftir að áhöfn og farþegar urðu varir við reykjalykt í farþegarýminu. Íslenskur flugvirki rakti lyktina til skammhlaups í sjónvarpsskjá sem staðsettur var í rýminu.

Flugvirkinn gerði við tækið en ísraelsk flugmálayfirvöld gáfu áhöfn vélarinnar ekki heimild til þess að fljúga til New York og sendu ísraelskan vélvirkja til þess að rannsaka þotuna sem var af gerðinni Boeing 747-400

Flugvirkinn kom tæpum sólarhring seinna og komst að sömu niðurstöðu og íslenskur starfsbróðir hans og staðfesti að búið væri að gera við bilunina. Eftir það gat flugvélin farið í loftið, en röskun varð á flugi milli Ísrael og Bandaríkjanna vegna atviksins.