Telja myntsamstarf milli Íslands og Noregs vera óraunhæft

Formaður Samfylkingarinnar og formaður norska Verkamannaflokksins telja báðir að horfast verði í augu við þá staðreynd að gjaldmiðlasamstarf Íslands og Noregs sé óraunhæft. Þetta kemur fram í tilkynningu frá Samfylkingunni vegna fundar sem þau Ingibjörg Sólrún Gísladóttir og Jens Stoltenberg áttu við Bláa Lónið í dag.

Í tilkynningu frá Samfylkingunni kemur fram að formennirnir hafi verið sammála um að rætur fjármálakreppunnar liggi í græðgi og skorti á markvissum leikreglum og eftirliti. Mat þeirra sé að kreppan muni vara nokkurn tíma og að ekkert land verði með öllu ósnert af áhrifum hennar. Til að afstýra slíkum kreppum í framtíðinni þurfi að efla alþjóðlegt samstarf og regluverk. Slíkt sé í anda jafnaðarstefnunnar sem telji markaðinn öfluga leið til að leysa mörg verkefni en megi samt ekki stjórna ferðinni alfarið á kostnað annarra samfélagslegra gilda. Markaðurinn sé ágætur þjónn en afleitur herra. Þá sé lögð sérstök áhersla á að efla félagslegar lausnir á borð við velferðarkerfið til að mæta afleiðingum fjármálakreppunnar fyrir heimilin.

Ingibjörg Sólrún lagði áherslu á að styrkur hins norræna samstarfs hafi komið í ljós í viðbrögðunum við gjaldeyris- og bankakreppunni á Íslandi. Fyrir það séu Íslendingar þakklátir. Böndin séu ekki síst sterk þegar systurflokkar fara með forystu í ríkisstjórnum og deili sýn á grundvallaratriði og lausnir. Nú þurfi að skilgreina stöðuna og áætlun um endurreisn.