Sjómenn með áhyggjur af Landhelgisgæslunni

Farmanna- og fiskimannasamband Íslands lýsir þungum áhyggjum af þeim niðurskurði sem Landhelgisgæsla Íslands má þola. Í tilkynningu frá sambandinu segir að það ætti að vera stjórnvöldum á hverjum tíma kappsmál að Landhelgisgæslunni sé tryggt það fjármagn sem hún þarf til að sinna hlutverki sínu til leitar og björgunar.

„Óþarft ætti að vera að minna á að margir eiga líf sitt því að þakka að þyrla gat heimt þá úr bráðum lífsháska," segir ennfremur. „Ljóst er að við núverandi ástand getur Landhelgisgæslan hvorki sinnt þessu hlutverki sínu né öðrum sem lög kveða á um s.s. eftirlit með fiskveiðilögsögunni."