Minni skömm en áður

Nærri 170 fasteignir hafa verið seldar nauðungarsölu hjá Sýslumanninum í Reykjavík það sem af er þessu ári. Það eru fleiri nauðungarsölur en allt árið í fyrra.

Alþingi samþykkti síðasta vor lög sem heimila frestun nauðungarsölu fasteigna. Lögin falla úr gildi um næstu mánaðamót en þá er búist við holskeflu nauðungaruppboða.

Tæplega 100 uppboðum hefur verið frestað í samræmi við lögin.

Lögin eru nú til skoðunar hjá dómsmálaráðuneytinu með það fyrir augum að koma í veg fyrir að uppboðin komi til öll framkvæmda á sama tíma. Ragna Árnadóttir, dómsmálaráðherra, sagði í samtali við fréttastofu í dag að frekari frestun sé ekki inni í myndinni en reynt verður að fresta uppboðum í kringum jólin.

Á síðasta ári var 161 fasteign seld nauðungarsölu hjá Sýslumanninum í Reykjavík. Það sem af er þessu ári hafa 166 fasteignir verið seldar á nauðungaruppboði og eru uppboðin því þegar orðin fleiri en allt árið í fyrra.

Um tíu þúsund heimili í landinu eru talin vera í alvarlegum fjárhagsvanda.

Forstöðumaður Ráðgjafarstofu heimilanna segir að fólk sé ófeimnara við að leita sér aðstoðar í dag en áður.

„Frá hruninu hefur það breyst með þeim hætti að áður var það þannig að fólki fannst mjög erfitt að leita ráðgjafar hjá okkur. Það hefur gerbreyst. Fólki finnst ekkert erfitt að leita til okkar," segir Ásta Sigrún Helgadóttir, forstöðumaður Ráðgjafarstofu heimilanna.

„Það má segja að við erum öll í svo miklum erfiðleikum. Það er engin skömm í dag að eiga í greiðsluerfiðleikum sem kannski þótti áður," segir Ásta Sigrún.