Rannveig Rist kærði sýruárásina

Ætandi lakkleysir lenti rétt undir auga Rannveigar Rist forstjóra álversins í Straumsvík eftir árás skemmdarvarga á heimili hennar og fjölskyldubíl. Hefði getað farið verr, enda baneitrað efni að mati kunnugra. Rannveig kærði árásina til lögreglu.

Fimmta ágúst síðastliðinn í skjóli nætur var grænni málningu skvett á heimili Rannveigar Rist í Garðabænum. Fjöldi forkólfa útrásarinnar hafði þá áður fengið slíkar rauðar slettur á hús sín en Rannveig sem ekki telst til útrásarvíkinga var önnur í röð þeirra sem starfa við stóriðju til að verða fyrir eignaspjöllum. Viku fyrr hafði verið skvett á hús Friðriks Sophussonar og skömmu síðar var grænni málningu einnig skvett á heimili Hjörleifs Kvaran forstjóra Orkuveitu Reykjavíkur.

Árásin á heimili Rannveigar var hins vegar ólík þeim fyrri, því fjölskyldubíll hennar hafði verið baðaður í ætandi efni, lakkleysi að því er talið er. Þegar Rannveig kom út morguninn eftir skemmdarverkið og opnaði dyrnar að fjölskyldubílnum skvettist efnið úr hurðafalsinu á andlit hennar svo sársveið undan.

Fréttastofa náði tali af Rannveigu í dag en hún vildi ekkert tjá sig um þetta atvik. Hún kærði málið til lögreglu sem vildi ekkert tjá sig heldur um framgang rannsóknarinnar þegar eftir því var leitað í dag. Árásin á Rannveigu mun hins vegar skilja eftir sig ör í andliti hennar og mildi þykir að efnið skuli ekki hafa lent í auga hennar en það er ákaflega ætandi og samkvæmt upplýsingum frá eitrunarmiðstöð Landspítalans hefði það getað valdið blöðrum og brennt slímhúð augans.