Dylan handtekinn

Lögreglan í New Jersey þurfti að hafa afskipti af tónlistarmanninum Bob Dylan þegar sást til hans spranga um í garði seint um kvöld fyrir utan einbýlishús í bænum Long Branch.

Eigendur hússins hringdu í lögregluna og tilkynntu um grunsamlegar mannaferðir í garðinum. „Ég spurði hann hvað hann héti og hann sagði: „Bob Dylan“,“ sagði lögreglukonan sem var kölluð á vettvang. „Ég hef séð gamlar myndir af Bob Dylan og þessi maður leit alls ekki út eins og Bob Dylan.“

Eftir að Dylan hafði útskýrt fyrir henni að hann væri á tónleikaferð um Bandaríkin skutlaði hún honum aftur í tónleika­rútuna, þar sem hún fékk staðfest að hann væri í raun og veru Bob Dylan. Ekki er vitað hvers vegna kappinn var á vappi fyrir utan húsið en hugsanlegt er að hann hafi verið að leita að húsinu sem Bruce Springsteen bjó í þegar hann samdi lagið Born to Run.