Glæsilegt afmæli Maríu

Söngskóli Maríu Bjarkar fagnaði fimmtán ára afmæli á fimmtudaginn en þar hafa margar af fremstu söngkonum landsins stigið sín fyrstu skref í átt til frægðar og frama.

Söngskólinn hefur um árabil haft marga af fremstu söngvurum landsins sem kennara og nægir þar að nefna Regínu Ósk, Heru Björk og Emilíu úr Nylon-flokknum gamla. Eflaust er þó á engan hallað þegar fullyrt er að stjarna skólans sé um þessar mundir Jóhanna Guðrún, silfurstjarnan frá Eurovision-keppninni í Moskvu. Jóhanna er nánast alin upp innan veggja Söngskólans og var uppgötvuð þar af skólastjóranum, Maríu sjálfri.

Óhætt er að fullyrða að allir geta fundið nokkuð við sitt hæfi hjá Söngskólanum því boðið er upp á námskeið fyrir krakka niður í þriggja ára aldur. Þá hafa geisladiskar söngskólans, Söngvaborg, slegið í gegn hjá smáfólkinu, sem þykir fátt jafn skemmtilegt og að dilla sér við skemmtilegar útfærslur af barnalögum. Fjöldi vina og velunnara skólans mætti að sjálfsögðu í afmæli sem var haldið í húsakynnum skólans við Fákafen 11.- fgg