Russell Brand bætir Katy Perry á listann

Samkvæmt nýjustu fréttum vestanhafs fór ofurdólgurinn Russell Brand með hina fagursköpuðu Katy Perry í ferðalag til Taílands á dögunum.

Engum sögum fer af því hvað gekk á í ferðinni, en Brand er þekktur kvennabósi með gríðarlega langan lista af ástkonum.

Hvorki Brand né Perry hafa staðfest sögusagnirnar, en sú síðarnefnda þykir hafa komið upp um sig þegar hún skrifaði eftirfarandi skilaboð á Twitter-síðu sína: „Eftir vikudvöl í Taílandi er ég tilbúin að horfast í augu við lífið aftur. Er í einkakennslu um Morrissey, Oscar Wilde og Peter Sellers... Innblásin!" Russell Brand er mikill aðdáandi þessa þriggja manna og hefur án efa kennt Perry sitthvað um líf þeirra og listir.

Upphaf sambandsins má rekja til MTV-myndbandaverðlaunanna sem fóru fram á dögunum. Þau náðu vel saman í partíi eftir hátíðina og eiga að hafa kysst hvort annað - á munninn!- afb