Meindýraeyðirinn á Húsavík: Ekki rétt að skjóta sendiboðann

Ómar Örn Jónsson, meindýraeyðir, segir að margt megi læra af máli kattarins Carras sem hann skaut á færi á þriðjudagskvöldið á Húsavík. Ómar Örn segir að víða sé pottur brotinn þegar kemur að réttindum gæludýraeigenda, dýranna sjálfra og þeirra sem þurfa að umbera ókunnug dýr á einkalóð eða heimili.

„Auðvitað á að skoða þetta mál í heild og rétt skal vera rétt. Ég tel þó að byrjað sé á vitlausum enda með því að byrja á að skjóta sendiboðann," segir Ómar Örn í tilkynningu sem hann sendi fjölmiðlum vegna málsins.

Kötturinn Carras var skotinn af færi vegna þess að nú stendur yfir átak þar sem reynt er að losa Húsavík, sem tilheyrir Norðurþingi, við lausagöngu katta og hunda. Málið hefur vakið hörð viðbrögð og hefur formaður Dýraverndarsambands Íslands gagnrýnt vinnubrögðin harðlega.

„Það má alveg deila um það hversu ógeðfelldar þessar framkvæmdir eru og hvort þessi reglugerð á rétt á sér eður ei, en mitt starf felst einungis í því að framfylgja því sem Norðurþing í þessu tilfelli ræður mig til að gera," segir meindýraeyðirinn.

Ómar Örn segir að eftir að reglugerð um hunda- og kattahald í bæjarfélaginu tók gildi hafi hann tekið í sína vörslu á bilinu 30 til 40 ómerkta ketti og sumir hafi auk þess ekki verið með ól og bjöllu. „Allir hafa þeir komist í hendur eigenda sinna aftur. Ég vil hvetja kattareigendur í Norðurþingi til að skrá gæludýrin sín sér og þeim til heilla," segir Ómar Örn að lokum.