Beckham nálægt því að ganga í raðir AC Milan á ný

Stórstjarnan David Beckham hefur staðfest að hann muni að öllu óbreyttu snúa aftur til AC Milan á láni frá LA Galaxy þegar tímabilið í MLS-deildinni klárast og félagaskiptaglugginn opnar í janúar.

Með því að fara til AC Milan vonast Beckham til þess að hann nái að heilla landsliðsþjálfarann Fabio Capello og vinna sér sæti í landsliðshópi Englands fyrir lokakeppni HM næsta sumar.

„Það eru vissulega fleiri möguleikar í stöðunni en ekkert hefur enn komið upp sem kemur í veg fyrir að ég velji AC Milan. Við erum ekki langt frá því að ganga frá málum," segir Beckham í viðtali við dagblaðið Mail on Sunday.