ESB tillögu dreift á þingi

Tillögu til þingsályktunar um að ríkisstjórnin leggi fram umsókn um aðild að Evrópusambandinu var dreift á Alþingi í dag. Í athugasemdum við tillöguna segir að hún sé lögð fram til þess að íslenska þjóðin fái tækifæri til að hafna eða samþykkja samning um aðild að sambandinu þegar hann liggur fyrir. Þá segir að víðtækt samráð verði haft við hagsmunaaðila um samningsmarkmið á ýmsum sviðum auk þess sem skoðað verði hvort unnt verði að ná fram samstarfi í gjaldmiðilsmálum samhliða viðræðum um hugsanlega aðild til þess að styðja við gengi krónunnar. Búast má við því að málið verði rætt á Alþingi síðar í vikunni.

„Málsaðilar áskilja sér rétt til að mæla með eða leggjast gegn samningnum þegar hann liggur fyrir enda eru settir margvíslegir fyrirvarar við hugsanlegan stuðning við málið," segir einnig.

Í athugasemdum við tillöguna eru einnig settir fram grundvallar hagsmunir Íslands í viðræðunum en þeir eru:

• Að tryggja forræði þjóðarinnar yfir vatns- og orkuauðlindum og ráðstöfun þeirra.

• Að tryggja forræði þjóðarinnar yfir fiskveiðiauðlindinni, sjálfbæra nýtingu auðlindarinnar og hlutdeild í deilistofnum og eins víðtækt forsvar í hagsmunagæslu í sjávarútvegi í alþjóðasamningum og hægt er.

• Að tryggja öflugan íslenskan landbúnað á grundvelli fæðuöryggis og matvælaöryggis.

• Að tryggja lýðræðislegan rétt til að stýra almannaþjónustu á félagslegum forsendum.

• Að standa vörð um réttindi launafólks og vinnurétt.

• Að ná fram hagstæðu og vaxtarhvetjandi samkeppnis- og starfsumhverfi fyrir atvinnulíf á Íslandi um leið og sérstöðu vegna sérstakra aðstæðna er gætt.

Þá segir að stefnt sé að því að Alþingi setji á fót sérstaka Evrópunefnd Alþingis með fulltrúum allra stjórnmálaflokka er fari með samskipti við viðræðunefnd vegna ESB.